ஜோன் ஹஸ் (JOHN HUSS, 1360-1415 A.D.)

by டேவிட் அண்ணா

>>>

ஆரம்ப சபைசீர்திருத்தப் பிதாக்களில் ஒருவரான ‘ஜோன் ஹஸ்’, ஓர் வறிய விவசாயக் குடும்பத்தில் பிறந்து வளர்ந்தார். தேவன் இவருக்கு அளித்திருந்த திறமையையும் ஞானத்தையும் இவர் சரியாகப் பயன்படுத்தியதால் ஜரோப்பாவில் பாரிஸ் (Paris), ஒக்ஸ்போர்ட் (Oxford) பல்கலைக்கழகங்களை விட அக்காலத்தில் செல்வாக்கு மிகுந்ததாயிருந்த பிராக் (Prague) பல்கலைக்கழகத்தில் போதகராக பணியாற்றும் பொறுப்பு இவருக்குக் கிடைத்தது. ஹஸ் மெய்யான மனந்திரும்புதலைப் பெற்று பொகீமிய மொழியில் (Bohemian) பிரசங்கம் செய்யக்கூடிய சிறந்த பிரசங்கியாராக இருந்தார். சுவிசே~த்தை மிகவும் உணர்ச்சியுடனும், ஆர்வத்துடனும் பிரசங்கித்து பொதுவாக பாவச் செயல்களையெல்லாம் கண்டித்து வந்தார். அந்தவகையில், ஏனைய மதகுருமார்களுடைய உலகப்பிரகாரமான வாழ்க்கையையும், பக்திவிருத்தியற்ற நடைமுறையையும் அவர் கண்டித்துப் பிரசங்கிக்க அவர்கள் இவருக்கு எதிரிகளாக மாறினர்.

அக்காலத்தில் ஒக்ஸ்போர்ட் பல்கலைக்கழகத்துக்கும், பிராக் பல்கலைக்கழகத்துக்கும் பெருந்தொடர்புகள் இருந்ததால் தலைசிறந்த கல்விமானும், சபை சீர்திருத்த முன்னோடியுமாயிருந்த ஜோன் விக்கிளிப் (John Wycliff)  என்பவரது அறிமுகம் கிடைத்து, அவரது போதனைகளும், எழுத்தாக்கங்களும் பிராகை வந்தடைந்தன. அப்போதனைகள் ஜோன் ஹஸ் மற்றும் அவரைச் சார்ந்தவர்களை பெரிதும் கவர்ந்தன. காலங்கள் கடந்தன. ஹஸ்ஸின் இறைபணி வளர்ச்சி கண்டது. அனேகர் பாவ வரழ்க்கையை விட்டு மனந்திரும்பி, இயேசுவை தம் சொந்த இரட்சகராக ஏற்று, வேதாகம சத்தியத்தில் படிப்படியாக வேரூன்றி வாழ ஆரம்பித்தனர். இதனால் வெறுப்படைந்த, ஜெமார்னியர்கள் ஹஸ் போலிப்போதனைகளை அளிப்பதாக குற்றஞ்சாட்டினர். பிராங்கின் பொது இடங்களில்; ஜோன் ஹஸ்ஸின் நூல்கள் எரிக்கப்பட்டன. அந்நகரின் Arch Bishop ஹஸ்ஸின் பிரசங்கத்தைத் தடைசெய்ய முயன்றார்.

இறுதியில் கான்ஸ்டன்ஸில் (Constance) இருந்த கவுன்சிலின் முன்வரும்படி அவருக்கு அழைப்பு விடுக்கப்பட்டது. ஜெர்மானிய அரசரான சிகிஸ்மான்ட் (Sigismund)  நல்ல முறையில் அவர் விசாரிக்கப்படுவார் என்று கொடுத்த வாக்கின் காரணமாக ஹஸ் கான்ஸ்டன்ஸ_க்குப் போனார். ஆனால், உடனடியாக அங்கே அவர் சிறையில் தள்ளப்பட்டு கொடுமைப்படுத்தப்பட்டார். அவரை உடனடியாக விடுவிக்கும்படி அரசன் உத்தரவிட்ட போதும், போப்பினதும், கார்டினல்களுடையதும் பயமுறுத்தலுக்கு அடங்கி அந்த உத்தரவை அவன் மீளப்பெற்றுக்கொள்ள நேர்ந்தது. 

ஏழு மாதங்களுக்கு சிறையில் கொடுமைப்படுத்தப்பட்டபின் பெயரளவுக்கு அவர் விசாரனைக்குக் கொண்டுவரப்பட்டார். எதிரிகள் விசாரனை மண்டபத்தில் அவரைப் பேசவிடாமல் ‘நீ எழுதியவற்றை மறுத்துரை’ என்று கூக்குரலிட்டனர். மாறுத்தரமாக, ‘கர்த்தருடைய வார்த்தைக்கு எதிராக இருந்தால் மட்டுமே தான் எழுதியவற்றை மறுத்துரைப்பேன்’ என்று ஹஸ் ஆணித்தரமாகக் கூறினார். கி.பி. 1415 ஆம் ஆண்டில் கவுன்சிலினால் தீர்ப்பளிக்கப்பட்டு கான்ஸ்டன்சுக்கு வெளியில் ஜனங்கள் அனைவரும் காணத்தக்கதாக நகர அதிகாரிகளால் அவர் மிகவும் கொடூரமான முறையில் நெருப்பில் போடப்பட்டு உயிரோடு எரிக்கப்பட்டார். இவ்வாறு சத்தியத்திற்காக ஹஸ் இரத்தசாட்சியாக மரித்தார்.

நீதிமானான ஜோன் ஹஸ் உயிரோடு எரிக்கப்பட்டதற்கு மூலகாரணமாக இருந்த போப் 23ம் ஜோன் (Pope John XXIII)  என்பவரோ மிகமோசமான வாழ்க்கை வாழ்ந்து வந்தார். வரலாறு இந்தப் போப்பைப் பற்றி எந்த நல்ல வார்த்தைகளையும் சொல்லவில்லை. இப்படியாக உரோமன் கத்தோலிக்க மதத்திற்கெதிரான சீர்திருத்தப் போராட்டம் தலையெடுக்க ஆரம்பித்தது. அப்போதிருந்த அதிகார வெறிபிடித்த போப்பும், அவரைச் சார்ந்தவர்களும் தமக்கெதிராகப் புறப்பட்டவர்களை உயிரோடு கொளுத்தவும் தவறவில்லை. எந்தளவுக்கு  கத்தோலிக்க மதம் அக்காலத்தில் வேதாகம சத்தியங்களுக்கு முரணாகச் செயற்பட்டு வந்துள்ளது என்பதை வரலாறு இன்றெமக்கு விரல்சுட்டி காட்டுகின்றது. இருந்தபோதும், சத்தியத்தை அம்மதத்தால் புதைத்துவிட முடியவில்லை. சத்தியத்தின் மீது வாஞ்சையுள்ளவர்களை அதனால் பேசாமல் அடக்கிவைத்துவிடவும் முடியவில்லை.

ஆம் நண்பர்களே, ஜோன் ஹஸ்ஸின் வாழ்க்கைக்சரிதை பற்றியும், அவர் எவ்வாறு சத்தியத்திற்கு சான்று பகிர்ந்தார் என்பதையும் இன்று கற்றுக்கொண்ட நாம், இதுவரையில் நம்முடைய வாழ்க்கையில், குடும்பத்தில், பாடசாலையில், சமுதாயத்தில் சத்தியத்திற்கு சான்றுபகிர்ந்திருக்கிறோமா? அல்லது சான்றுபகிர வெட்கப்பட்டிருக்கிறோமா? என்று ஒரு கணம் நம்மைநாமே ஆராய்;ந்து பார்ப்போம். இயேசு கிறிஸ்துவைக் குறித்தும், அவருடைய வார்த்தைகளைக் குறித்தும் பிறருக்கு அறிவிக்கவும் சத்தியத்திற்கு சான்று பகிரவும் இன்று நாம் வெட்கப்பட்டோமானால், எம்மைக் குறித்து இயேசு கிறிஸ்துவும் தமது பிதாவின் மகிமைபொருந்தினவராய்ப் பரிசுத்த தூதர்களோடுங்கூட வரும்போது வெட்கப்படுவார் என்று மாற்கு 8:38 இல் இயேசு தாமே கூறியுள்ளார். 

மேலும், ‘சத்தியத்தையும் அறிவீர்கள், சத்தியம் உங்களை விடுதலையாக்கும்’ என்று யோவான் 8:32 இல் எழுதப்பட்டுள்ளது. இங்கு ‘சத்தியம்’(உண்மை) என்பது தேவனுடைய வார்த்தையைக் குறிக்கிறது. மேலும் அதனை யோவான் 1:1, 8:36 உடன் ஒப்பிட்டு பார்க்கும்; போது தேவனுடைய வார்த்தை என்பது இயேசுவையே குறிக்கிறது என்பது தெளிவாகிறது. எனவே, சத்தியமும் தேவனுடைய வார்த்தையும் இயேசுவும் ஒன்றுதான் என்கிற முடிவுக்கு எம்மால் வரமுடியும். ஆகவே, நாம் சத்தியத்தை அதிகமாய் அறியும் போது இயேசுவைப் பற்றி அதிகமாய் அறிந்து கொள்ளுகிறோம். அந்த சத்திய வார்த்தை (இயேசு கிறிஸ்து) எம்மை விடுதலையாக்குகிறது. ஆகவே, எமக்கு விடுதலைகொடுத்த அந்த சத்தியத்திற்காக சான்று பகிர நாமனைவரும் கடமைப்பட்டுள்ளோம். இன்று தொடக்கம் ஜோன் ஹஸ்ஸை போன்று எப்போதும் வெட்கப்படாலும் பயப்படாமலும் ஆண்டவர் தரும் பெலத்தோடும், பரிசுத்த ஆவியின் வழிநடத்துதலோடும் சத்தியத்திற்கு சான்று பகிர எம்மை அர்ப்பணிப்போமாக!

“என் நாமத்தினிமித்தம், அவர்கள் உங்களைப் பிடித்து, ஜெபஆலயங்களுக்கும் சிறைச்சாலைகளுக்கும் ஒப்புக்கொடுத்து, ராஜாக்கள் முன்பாகவும் அதிபதிகள் முன்பாகவும்; உங்களை இழுத்துத் துன்பப்படுத்துவார்கள். ஆனாலும் அது உங்களுக்குச் சாட்சியாவதற்கு ஏதுவாயிருக்கும். ஆகையால் என்ன உத்தரவு சொல்லுவோமென்று கவலைப்படாதிருக்கும்படி உங்கள் மனதிலே நிர்ணயம்பண்ணிக்கொள்ளுங்கள். உங்களை விரோதிக்கிறவர்கள் ஒருவரும் எதிர்பேசவும் எதிர்நிற்கவும் கூடாத வாக்கையும் ஞானத்தையும் நான் உங்களுக்குக் கொடுப்பேன்.”

(லூக்கா 21:12-15)