உகண்டாவுக்கு சென்ற மிஷனரி – ஜேம்ஸ் ஹன்னிங்டன் (1847-1885)

 

by டேவிட் அண்ணா

>>>

‘அசுத்தமான குடிசை. விஷப்பூச்சிகளும் எலிகளும் நிறைந்த குடிசை. அந்த குடிசையில் அடைத்து வைத்தால் போதும் யாராயிருந்தாலும் ஒரு வாரத்திற்குள்ளாகவே மரணித்து விடுவர். அப்படிப்பட்ட மோசமான இடத்தில்தான் சிறைவைக்கப்படுகிறார். ஆனால் மற்றவர்களைப் போல இவர் மரணித்தும் போகவில்லை. மனந்தளர்ந்தும் போகவில்லை. இதைப்பொறுத்துக் கொள்ளாத சிற்றரசன் அவரைக் கொலை செய்யும்படி உத்தரவிடுகிறான்.’ யார் இவர்? உண்மையாகவே கொலை செய்யப்பட்டாரா?

செப்டெம்பர் 3, 1847ம் ஆண்டு இங்கிலாந்தில் சசெக்ஸ் எனும் பகுதியில் நடுத்தர குடும்பத்தில் பிறந்த இவர் படிப்பை முடித்து ஒரு வங்கியில் பணியாளராக இருந்தார். சில காலங்களில் இறையியலை படிப்பதில் நாட்டங்கொண்டவராய் தன் வேலையைத் துறந்து இறையியல் கல்லூரி  படிப்பை முடித்தார். இவருடைய பெயர் ஜேம்ஸ் ஹன்னிங்டன். இறையியல் படிப்பை முடித்த இவர் ‘இயேசுவே மெய்யான தெய்வம்’ என்று அறிவிக்கும் சுவிசேஷ ஊழியத்தில் தன்னை அர்ப்பணித்துக் கொண்டு 1875 இல் அவரது சொந்த ஊரிலேயே ஆலய பொறுப்பாளராகவும் ஊழியம் செய்தார். 

கிழக்கு ஆபிரிக்காவில் தன்னார்வ தொண்டு செய்யும் படியாக இங்கிலாந்து நாட்டின் Church Missionary Soceity இல் சேர்ந்து மிஷனரி ஊழியத்திற்கு தன்னை அர்ப்பணித்தார். அப்போது அவருக்கு திருமணமாகி 5 வருடங்களே ஆகியிருந்தது. ஜூன் 29, 1882 இல் சான்சீபர் தீவிற்கு 6 பேர் கொண்ட மிஷனரிகளுக்கு தலைவராக பயணத்தைத் தொடங்கினார் ஹனிங்டன். சான்சீபர் தீவு அடிமை வியாபார மையமாகவிருந்த காலமது. அதுமட்டுமல்லாது கொடுமையான பல நோய்களுக்கும் பிறப்பிடமாகவும் இருந்தது. பாலியல் நோய்கள், மலேரியா, தைபோயிட் போன்ற கொடுமையான நோய்களுக்கு மத்தியில் ஊழியம் செய்பவர்களுக்கும் அநேக இன்னல்கள் இருந்தது. காய்ச்சல் மற்றும் வயிற்றுப்போக்கின் நிமித்தம் முடக்கப்பட்ட ஜேம்ஸ் ஹன்னிங்டன் 1883 இல் தன் சொந்த நாட்டிற்கு திரும்ப வேண்டிய கட்டாயத்திற்கு தள்ளப்பட்டார்.

ஜுன் 24இ 1884 இல் உடல் சற்றுத் தேறியிருந்த அவர் Arch Bishop ஆக பதவி உயர்த்தப்பட்டு இம்முறை உகண்டா தேசத்திற்கு மிஷனரி பணித்தள பொறுப்பாளராக அனுப்பப்பட்டார். உகண்டா தேசத்தில் பல பாடசாலைகளை நிறுவினார். பல தொண்டு சேவைகளையும் ஆற்றினார். இதனால் மக்கள் மத்தியில் இவருக்கு நன்மதிப்பு ஏற்பட்டது. பாகுபாடற்ற அவரின் அன்பு காட்டும் தன்மை கிறிஸ்துவின் அன்பை ஜனங்களுக்கு பிரதிபலித்தது. சுவிசேஷமும் மிக வேகமாக பரவியது. அனேக ஜனங்கள் இயேசுவை தன் சொந்த இரட்சகராக ஏற்றுக்கொண்டு இயேசுவின் பாதத்தில் தங்களை அர்ப்பணித்தனர்.

மக்கள் மத்தியில் இவருக்கு ஏற்பட்டிருந்த செல்வாக்கையும், ஜனங்கள் இயேசுவின் பாதத்தில் சேர்க்கப்படுவதையும் தாங்கிக்கொள்ளாத 2ம் வாங்கே என்ற சிற்றரசன் ஹன்னிங்டனை கொலை செய்ய வகை தேடினான். கூடவே ‘உகண்டாவை ஆளப்போகிறவர் கிழக்கிலிருந்து தான் வரவேண்டும்’ என்ற நம்பிக்கை வேறு அங்கிருந்தது. இதன் காரணமாக ஜேம்ஸ் ஹன்னிங்டன் மீது ஏராளமான பொய்க் குற்றச்சாட்டுக்களை சாட்டி அவரையும் அவரோடு கூட இருந்த மற்றைய மிஷனரிகளையும் சிறையிலடைத்தான் அந்த சிற்றரசன்.

 அவன், சிறைப்படுத்த தெரிந்தெடுத்த இடம் தான் அந்த விஷப்பூச்சிகளும், எலிகளும் நிறைந்த அருவருப்பான குடிசை. ‘ஒரு வாரத்திற்குள் அவர்கள் மரித்துவிடுவர்; நமக்கு எந்த அச்சுறுத்தலும் இல்லை’ என நினைத்திருந்த அச் சிற்றரசனுக்கு ஏமாற்றமே காத்திருந்தது. அதனால் மிகவும் கோபமடைந்த அவன் 8 நாட்களாக சிறையிருப்பிலிருந்த ஜேம்ஸ் உடன் பணிபுரிந்த மிஷனரிகளை 29 ஒக்டோபர், 1885இல் கொலை செய்தான். ஜேம்ஸ் ஹன்னிங்டனையோ பொது மேடையில் நிறுத்தி இருபுறமும் ஈட்டியால் குத்திக் கொலை செய்யும் படி உத்தரவிடுகிறான். அவர் ஈட்டியால் குத்தப்பட்ட போது, ‘இயேசுவை உகண்டாவிற்கு கொண்டுவரும் படியான பாதையை என் இரத்தத்தை விலைக்கிரயமாகச் செலுத்தி வாங்கிவிட்டேன்’ என உங்கள் சிற்றரசனிடம் போய்ச் சொல்லுங்கள் என்று கூறி ஜீவனை விட்டார்.

தன்னுடைய 38வது வயதிலேயே இயேசுவுக்காய் இரத்தசாட்சியாய் மரித்தார். இந்த சம்பவம் கிறிஸ்தவ உலகை பேரதிர்ச்சிக்குள்ளாக்கியது. அவரது மரணத்தைத் தொடர்ந்து அனேக மிஷனரிகள் தங்கள் உயிரை துச்சமாக நினைத்து தங்களை உகண்டாவிற்கு மிஷனரி ஊழியம் செய்யும் படி அர்ப்பணித்தனர். அவ்வாறு சென்றவருள் அனேகர் கிறிஸ்துவுக்காக இரத்தசாட்சிகளாக அங்கேயே மரித்தனர். 

2014, ஆகஸ்ட் மாதம் எடுக்கப்பட்ட கணக்கெடுப்பின் படி உகண்டாவின் மொத்த மக்கள் தொகையில் 84.5 வீதமானோர் இயேசுவை தங்கள் சொந்த இரட்சகராக ஏற்றுக்கொண்டுள்ளனர். அன்று ஹன்னிங்டன் மரிக்கும் தறுவாயில் விசுவாசத்துடன் கூறிய ‘இயேசுவை கொண்டு செல்லும் படியான பாதையை என் இரத்தத்தைக் கொண்டு சம்பாதித்தேன்’ என்கிற வார்த்தை, எவ்வளவு உண்மையானதென பாருங்கள். ஜேம்ஸ் ஹன்னிங்டனைப் போலவே நாமும் பாவ இருளில் இருக்கும் ஜனத்தண்டைக்கு இயேசுவையும் தேவ ராஜ்ஜியத்தின் சுவிசேஷத்தையும் கொண்டு செல்ல ஆயத்தப்படுவோம்! அதற்கு எம்மை அர்ப்பணிப்போம்!

‘ஆதலால் கர்த்தருடைய நாமத்தைத் தொழுதுகொள்ளுகிற எவனும் இரட்சிக்கப்படுவான்.

அவரை விசுவாசியாதவர்கள் எப்படி அவரைத் தொழுதுகொள்ளுவார்கள்? அவரைக்குறித்துக் கேள்விப்படாதவர்கள் எப்படி விசுவாசிப்பார்கள்? பிரசங்கிக்கிறவன் இல்லாவிட்டால் எப்படிக் கேள்விப்படுவார்கள்?

அனுப்பப்படாவிட்டால் எப்படிப் பிரசங்கிப்பார்கள்? சமாதானத்தைக்கூறி நற்காரியங்களைச் சுவிசேஷமாய் அறிவிக்கிறவர்களுடைய பாதங்கள் எவ்வளவு அழகானவைகள் என்று எழுதியிருக்கிறதே.’ 

(ரோமர் 10:13-15)

கர்த்தர் தாமே உங்களை ஆசீர்வதிப்பாராக! ஆமென்.